ශ්‍රී ලංකාවේ අපනයනය ඩොලර් බිලියන 1.3 ඉක්මවයි...

2025 ජනවාරි මාසයේදී ශ්‍රී ලංකාවේ අපනයනය ඩොලර් බිලියන 1.3 ඉක්මවා ගොස් ඇති අතර එය වසරට අපේක්ෂිත සහ ශක්තිමත් ආරම්භයක් සනිටුහන් කරයි.

මෙම කැපී පෙනෙන වර්ධනය ශ්‍රී ලාංකාවේ කර්මාන්ත සඳහා ඔරොත්තු දීමේ හැකියාව, නවෝත්පාදනය සහ තරඟකාරිත්වය පිළිබිඹු කරන අතර, තිරසාර ආර්ථික සාර්ථකත්වයකට මග පාදා දෙන බව අපනයන මණ්ඩලය නිවේදනයක් නිකුත් කරමින් කියා සිටී.

ශ්‍රී ලංකා රේගුව විසින් නිකුත් කරන ලද දත්තවලට අනුව 2025 ජනවාරි මාසයේදී වෙළඳ භාණ්ඩ අපනයන කාර්ය සාධනය ඇමෙරිකානු ඩොලර් මිලියන 1,004.82 ක් වූ අතර එය 2024 ජනවාරි මාසයට සාපේක්ෂව 3.51% ක වර්ධනයක් වාර්තා කළේය.

2024 ජනවාරි මාසයට සාපේක්ෂව, කෘෂිකාර්මික අපනයන 14.87% ක සැලකිය යුතු වර්ධනයක් පෙන්නුම් කළ අතර, 2025 ජනවාරි මාසයේදී ඇමෙරිකානු ඩොලර් මිලියන 258.93 දක්වා ළඟා විය. මීට අමතරව, කාර්මික අපනයන ජනවාරි මාසය තුළදී 0.08% ක වර්ධනයක් අත්විඳ, ඩොලර් මිලියන 745.89 දක්වා වැඩි විය.

2025 ජනවාරි මාසය සඳහා ඇස්තමේන්තුගත සේවා අපනයන වටිනාකම ඇමෙරිකානු ඩොලර් මිලියන 329.37 ක් වූ අතර එය 2024 ජනවාරි මාසයට සාපේක්ෂව 37.87% කින් වැඩි විය.

එහි ප්‍රතිඵලයක් ලෙස, 2025 ජනවාරි සඳහා වෙළඳ භාණ්ඩ සහ සේවා යන දෙකම ඇතුළුව මුළු අපනයනය ඇමෙරිකානු ඩොලර් මිලියන 1,334.19ක් ලෙස සටහන් විය.