ගුවන් සේවිකාවකට අතවර කිරීමට උත්සාහ කළ විදේශිකයා අත්අඩංගුවට...

ශ්‍රී ලංකන් ගුවන් යානයකදී ගුවන් සේවිකාවකට ලිංගික අතවර කිරීමට තැත් කිරීමේ චෝදනාව මත අත්අඩංගුවට ගත් 65 හැවිරිදි මගියා අධිකරණයට ඉදිරිපත් කිරීමට නියමිත බව පොලිසිය පවසයි.

අත්අඩංගුවට ගත් ස්වීඩන් ජාතික සැකකරුගේ විදේශ ගමන් බලපත්‍රය අත්අඩංගුවට ගත් බව පොලිසිය පවසයි. ඔහු මීගමුව රෝහලේ අධිකරණ වෛද්‍ය නිලධාරීවරයා වෙත ඉදිරිපත් කර ඇත.

වාර්තා වන අන්දමට සැකකරු මාර්තු 11 වන දින ඉන්දියාවේ මුම්බායි සිට ගමන් කරමින් සිටියදී UL 14 දරණ ගුවන් යානයෙන් අද අලුයම කටුනායක ගුවන් තොටුපළට ගොඩබස්වා ඇති අතර එහිදී ඔහු අත්අඩංගුවට ගෙන ඇත.

එම අවස්ථාවේ අධික ලෙස බීමත්ව සිටි සැකකරු ගුවන් සේවිකාවකට ලිංගික අතවර කිරීමට ද උත්සාහ කළ අතර අනෙක් මගීන් අපහසුතාවට පත්වන අයුරින් හැසිරුණු බවට චෝදනා එල්ල වී තිබේ.

සැකකරු කොළඹ මහේස්ත්‍රාත් අධිකරණයට ඉදිරිපත් කිරීමට නියමිත අතර ගුවන්තොටුපළ පොලිසිය වැඩිදුර විමර්ශන සිදුකරයි.