වගා හානි සඳහා වන්දි ලබාදීම කඩිනම් කරයි...
- admin928749
- Mar 7
- 1 min read
පසුගිය දිනවල ඇති වූ අධික වර්ෂාව සහ ස්වභාවික විපත් හේතුවෙන් සිදු වූ වගා හානි සඳහා වන්දි ලබාදීමේ කටයුතු කඩිනම් කරන ලෙස ජනාධිපති අනුර කුමාර දිසානායක මහතා අදාළ නිලධාරීන්ට උපදෙස් ලබා දී තිබේ.
කෘෂිකර්ම, පශු සම්පත් ඉඩම් සහ වාරිමාර්ග අමාත්‍යාංශයේ නිලධාරීන් සමඟ ජනාධිපති කාර්යාලයේ පැවති හමුවකදී ජනාධිපතිවරයා මෙම උපදෙස් ලබා දුන්නේය.
2025 වසර සඳහා වන අයවැය ප්‍රතිපාදන, විශේෂයෙන් කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශයට නම් කර ඇති අරමුදල් සමාලෝචනය කිරීම සහ ඒවා අදාළ ව්‍යාපෘති සඳහා ඵලදායී ලෙස භාවිතා කිරීම සහතික කිරීම සඳහා මෙම රැස්වීම කැඳවා ඇත.
කෘෂිකාර්මික දත්තවල සාවද්‍යභාවය හේතුවෙන් තීරණ ගැනීමේ දී සිදුවන දෝෂ පිළිබඳව ජනාධිපතිතුමා නිලධාරීන්ගේ අවධානය යොමු කළේය.
පාරිභෝගිකයින්ට සාධාරණ මිලක් පවත්වා ගනිමින් ගොවීන් ආරක්ෂා කිරීමේ අරමුණින් කෘෂිකාර්මික නිෂ්පාදන සඳහා සාධාරණ වෙළඳපල මිලක් සහතික කිරීමේ අවශ්‍යතාවය ද අවධාරණය කෙරිණි.
පශු සම්පත් අංශයේ ප්‍රගමනය, අපනයනය ඉලක්ක කරගත් කෘෂිකාර්මික භෝග ප්‍රවර්ධනය සහ මිල්කෝ මෙහෙයුම්වල ප්‍රගතිය සඳහා වූ ක්‍රියාමාර්ග පිළිබඳව මෙම සාකච්ඡාවේදී අවධානය යොමු කෙරිණි.
Comments