මුදල් විශුද්ධිකරණය වැළැක්වීම සඳහා ජනපති ප්‍රධානත්වයෙන් විශේෂ සාකච්ඡාවක්...

මුදල් විශුද්ධිකරණය පිළිබඳ ආසියා/පැසිෆික් කණ්ඩායම (APG) විසින් ශ්‍රී ලංකාවේ ඉදිරි අන්‍යෝන්‍ය ඇගයීම (ME) සඳහා වන තීරණාත්මක සූදානම පිළිබඳ ඉහළ මට්ටමේ සාකච්ඡාවක් ජනාධිපති අනුර කුමාර දිසානායක මහතාගේ ප්‍රධානත්වයෙන් ජනාධිපති කාර්යාලයේදී පැවැත්විණි.

මුදල් විශුද්ධිකරණය වැළැක්වීම සහ ත්‍රස්තවාදයට මුල්‍ය සැපයීම (AML/CFT) සම්බන්ධයෙන් මෙම රැස්වීම අවධානය යොමු කළ අතර කැබිනට් අමාත්‍යවරුන්, අමාත්‍යාංශ ලේකම්වරුන්, ශ්‍රී ලංකා මහ බැංකුවේ නිලධාරීන් සහ මූල්‍ය බුද්ධි අංශයේ (FIU) සහභාගීත්වය ද ඇතුළත් විය.

නියාමන ආයතන සහ නීතිය ක්‍රියාත්මක කරන ආයතන ඇතුළු ප්‍රධාන ආයතන 24ක් සම්බන්ධ කැබිනට් අනුමැතිය ලත් ක්‍රියාකාරී සැලසුම් කඩිනම් ක්‍රියාත්මක කිරීම FIU විසින් අවධාරණය කරන ලදී. මෙම සැලසුම් මගින් මූල්‍ය ක්‍රියාකාරී කාර්ය සාධක බලකායේ (FATF) නිර්දේශ ඵලදායී ලෙස සපුරාලීම සඳහා නීතිමය ප්‍රතිසංස්කරණ, ධාරිතා ගොඩනැගීම, වැඩිදියුණු කරන ලද අන්තර් නියෝජිතායතන සහයෝගීතාව සහ විස්තීරණ වාර්තා පවත්වාගෙන යාම සඳහා ප්‍රමුඛත්වය දෙනු ලැබේ.

අනුකූලතාව සහතික කිරීම සහ ප්‍රගතිය සමීපව නිරීක්ෂණය කිරීම සඳහා කැපවූ කණ්ඩායම් පිහිටුවීමට ජනාධිපතිතුමා උපදෙස් දුන්නේය. ශ්‍රී ලංකාවේ AML/CFT රාමුව ශක්තිමත් කිරීමේදී සහයෝගීතාවයේ සහ වගවීමේ වැදගත්කම ඔහු අවධාරණය කළේය.

හිතකර ඇගයීම් ප්‍රතිඵල ලබා ගැනීමටත්, මූල්‍ය ස්ථාවරත්වය පවත්වා ගැනීමටත්, රටේ ආර්ථිකය කෙරෙහි ජාත්‍යන්තර විශ්වාසය තහවුරු කිරීමටත් ශක්තිමත් සහ ඵලදායී ක්‍රමවේදයක අවශ්‍යතාවය ඔහු අවධාරනය කළේය.