රජයේ ප්‍රතිපත්ති ප්‍රකාශයේ සුවිශේෂී කරුණු රැසක්...

ජනාධිපති අනුර කුමාර දිසානායක මහතා ශ්‍රී ලංකාවේ 10 වැනි පාර්ලිමේන්තුවේ මංගල සැසිවාරය ඇමතුහ.

ජනාධිපතිවරයාගේ රජයේ ප්‍රතිපත්ති ප්‍රකාශයේ ප්‍රධාන කරුණු 11ක් පහත දැක්වේ.

1. අතුරු සම්මත ගිණුම් පනත් කෙටුම්පතක් දෙසැම්බර් මාසයේදී පාර්ලිමේන්තුවට ඉදිරිපත් කෙරේ. 2025 අයවැය ලබන වසරේ පෙබරවාරි මාසයේදී ඉදිරිපත් කෙරේ.

   
   

2. ලබන වසරේ අයවැය හරහා රජය ඇස්වැසුම සමාජ ප්‍රතිලාභ වැඩසටහනේ දීමනාව සහ රාජ්‍ය අංශයේ සේවකයන්ගේ වැටුප් වැඩි කරනු ඇත.

   
   

3. ලබන වසරේ අයවැය හරහා රජය පාසල් උපකරණ මිලදී ගැනීම සඳහා දීමනා ලබා දෙනු ඇත.

   
   

4. තොරතුරු තාක්ෂණ ක්ෂේත්‍රයේ ශ්‍රම බලකාය 200,000 දක්වා වැඩි කරනු ලබන අතර, තොරතුරු තාක්ෂණ ආශ්‍රිත අපනයන වසරකට ඇමරිකානු ඩොලර් බිලියන 5 දක්වා ඉහළ නැංවීම අරමුණු කර ගෙන ඇත.

   
   

5. ජාත්‍යන්තර මූල්‍ය අරමුදලේ (IMF) බාහිර අරමුදල් පහසුකම (EFF) පිළිබඳ තුන්වන කාර්ය මණ්ඩල මට්ටමේ ගිවිසුම මෙම සිකුරාදා (නොවැ 23) වන විට අත්සන් කිරීමට රජය අපේක්ෂා කරයි.

   
   

6. ශ්‍රී ලංකාව තුළ නැවත වාර්ගික දේශපාලනයට හෝ ආගම්වාදයට ඉඩක් නොතබන බව ජනාධිපතිතුමා අවධාරණය කළේය.

   
   

7. ආර්ථික ප්‍රතිලාභ සාධාරණ ලෙස ජනතාව අතර බෙදී යා යුතු බවත් වෙළෙඳපොළ ඒකාධිකාරය අහෝසි කරන බවත් ජනාධිපතිතුමා පැවසීය.

   
   

8. ජනතාව වෙනුවෙන් කාර්යක්ෂම රාජ්‍ය සේවයක් ඇති කරන බව ජනාධිපතිතුමා පැවසීය.

   
   

9. දේශපාලනඥයන්, විධායක නිලධාරීන් ඇතුළු සියලු දෙනාම නීතියට අනුව කටයුතු කළ යුතු බවට ජනාධිපතිවරයා අනතුරු ඇඟවීය.

   
   

10. දූෂණයට සම්බන්ධ වැරදිකරුවන්ට නීතියට අනුව දඩුවම් ලබාදී වින්දිතයින්ට සාධාරණය ඉටුකරන බවට ජනාධිපතිවරයා සපථ කළේය.

    
    

11. පිවිතුරු ශ්‍රී ලංකා වැඩසටහන ක්‍රියාත්මක කිරීම සඳහා කාර්යසාධක බලකායක් නිර්මාණය කරන බව ජනාධිපතිතුමා පැවසීය.