ජපානය ශ්‍රී ලංකාවේ ඩිජිටල් පරිවර්තනය සහ වරාය සංවර්ධනය සඳහා ආයෝජනය කරයි...

ජනාධිපති අනුර කුමාර දිසානායක මැතිතුමා සහ ශ්‍රී ලංකාවේ ජපාන තානාපති H. E. Akio ISOMATA මහතා ජනාධිපති කාර්යාලයේදී හමුවිය.

මෙම හමුවේදී ජපානයේ සංචාරයක නිරත වන ලෙස තානාපතිවරයා ජනාධිපති දිසානායකට නිල වශයෙන් ආරාධනා කළ අතර නව රජයේ ප්‍රතිපත්ති රාමුව පිළිබඳව සිය ප්‍රසාදය පළ කළේය.

ජපාන රජය විසින් පසුගියදා දියත් කරන ලද ආරක්ෂක සහයෝගීතා සහය වැඩසටහනට ශ්‍රී ලංකාව ඇතුළත් කර ගැනීමට උත්සාහ දරා ඇති බව ජපාන තානාපතිවරයා ප්‍රකාශ කළේය.

තිස් වසරක ගැටුමෙන් පීඩාවට පත් උතුරු ප්‍රජාවන් අතර ජාතික සංහිඳියාව ඇති කිරීම අරමුණු කරගත් ජපාන-ස්විට්සර්ලන්ත-දකුණු අප්‍රිකා ඒකාබද්ධ වැඩසටහනේ අඛණ්ඩ සහ අනාගත මුලපිරීම් පිළිබඳව පුළුල් සාකච්ඡා පැවැත්විණි. මීට අමතරව, ඔවුන් ශ්‍රී ලංකාවේ ජපන් ආයෝජනවල වත්මන් තත්ත්වය සමාලෝචනය කළහ.

තවද, ඩිජිටල් ආර්ථික සහ ගුවන් තොටුපළ ආයෝජනවල වත්මන් තත්ත්වය සහ ප්‍රගතිය පිළිබඳව සාකච්ඡා කෙරිණි. ශ්‍රී ලංකාවේ ඩිජිටල් පරිවර්තන වැඩසටහනට සහය දැක්වීම සඳහා ජපානයේ කැපවීම ද තානාපතිවරයා යළි තහවුරු කළ අතර, ශ්‍රී ලංකාවේ වරාය සහ ගුවන් සේවා ආශ්‍රිත ව්‍යාපෘති සඳහා ආයෝජනය කිරීමට ජපාන රජයේ අභිප්‍රාය මෙන්ම ඩිජිටල්කරණ මුලපිරීම් ද අවධාරණය කළේය.

මෙම සාකච්ඡාවට ජනාධිපතිගේ ආර්ථික හා මූල්‍ය කටයුතු පිළිබඳ උපදේශක ආචාර්ය දුමින්ද හුලංගමුව, ජනාධිපති ජ්‍යෙෂ්ඨ අතිරේක ලේකම් රොෂාන් ගමගේ, පළමු ලේකම් සහ ආර්ථික හා සංවර්ධන සහයෝගිතා අංශයේ ප්‍රධානී OHASHI Kenji සහ පළමු ලේකම් සහ දේශපාලන අංශයේ ප්‍රධානී MURATA Shinichi යන මහත්ම මහත්මීහු සහභාගි වූහ.